Thursday October 16, 2008
تجارت وزير صاحب ته! ع. ص. عطايي
كابل
د ميزان ۲۲ كال ۱۳۸۷
د كوچني اختر دوهمه ورځ ده او زه له خپلو درو زامنو سره د مكرويان د بلاكونو په ساحه كې ګرځم او ډير واړه افغان كوچنيان وينم چې يو بل د اصلي توپكانو په څير په توپكانو باندې په نښه كوي.
دا توپكان كه څه هم دلوبو لپاره جوړ شوي دي، خو ځينې يې لكه اصلي توپكان ښكاريدل او ممكن لكه اصلي توپكانو دا توان هم ولري چې د يوه كوچني سترګي ړندې كړي.
زما درو زامنو هم غوښتل چې دا توپكان واخلي، خو كله چې ما د دې توپكانو عكسونه واخيستل، دوى له دې كاره ډډه وكړه. هر بالغ او عاقل انسان چې نن ورځ په افغانستان كې ژوند كوي دا فكر به هم ورسره يې چې ولي يو افغان كوچنې ته دا موقع نه وركړل كيږي چې لكه د نورو هيوادونو د كوچنيانو په څير ښو ښوونځيو كې زده كړي وكړي او د سپورت په ښو ميدانونو كې د فوټبال او نورو سپورتونو لوبي وكړي.
د لوبو لپاره توپك او يا اصلي توپك هغه كوچنيان اخلې چې د دوى په كليو او ښارونو كې د سپورت ميدانونه نه وي.
زما شپږ كلن زوى له ما وپوښتل چې ولې زه د دې توپكانو عكسونه اخلم، ما ورته وويل:
كه زه د كرزي صاحب، د تجارت صاحب ايميل آدرسونه ولرم، زه به هغه ته دا عكسونه وليږم او ورته ته به زارى وكړم چې د هغو تجارانو ليسنسونه دې بيرته واخلى چې دا توپكان او د باروتو پټاقى افغانستان ته راوړي.
او بيا مې ورته وويل چې كه دا پورتنې وزير صاحب زما زارى و نه مني، بيا به زه دا عكسونه د كابل ځينو ورڅپاڼو ته وليږم او هغوى ته به زارى وكړم چې د پنڅو زرو كلمو مضمونونو او د هندې فلمونو د نجونو او هلكانو د عكسونو پر ځاى دا عكسونه په خپلو ورځپانو كې خپاره كړي.
په تيرو دير شو كلونو كې افغانانو ډير توپكان ليدلي او د توپكانو د ګوليو آوازونه يې اوريدلي دي. افغان كوچنيان هم لكه د متحده ايالاتو او د اروپا هيوادونو د كوچنيانو په څير هيلى او آرزوګانې لري، او د يوې مناسبې ټولنې او فضا لياقت هم لري چې په كې را لوى شي.