وخت خبرى اژانس

كندهار- سپين بولدك

دتلې ۲۶مه

دكندهار ولايت دسپين بولدك ولسوالى په زرگونو استوگنو دخپلو اچول شويو رايو څخه ددفاع په موخه په پراخې مظاهره لاس پورې كړى او ددويم ځلي انتخاباتو سره يې خپل مخالفت اعلان كړ.

دمظاهره كونكيو تعداد چې د۱۰ او ۱۳ زرو ترومنځ ښودل شوى همدا اوس دسپين بولدك بازار نه دويش بازار خواته روان دي.

وخت خبرى اژانس خبريال همدا اوس دمظاهر كونكيو سره دخبرو لپاره سيمې ته ورغلى او وايى چې نږدې ۱۰ كلومتره سرك ټول، مظاهره كونكيو له خوا ډك شوى او دكندهار كوټې لويه لاره دترافيكو پرمخ تړل شوې.

يو تن مظاهره كونكى چې تادين خان نوميږي دسپين بولدك اسيدونكى وخت خبري اژانس سيمه ييز خبريال ته ووي: (( ددې لپاره مو مظاهره كړې چې دخپلو ووټونو څخه دفاع وكړو، شكاياتو كميسون زموږ رايو ته ارزښت نه وركوي.))

تادين خان وخت ته وويل: ((دوى درغلې كړې، رشتونه يې خوړلي، ځينو دلته رايى نه لرلې اوس غواړي زموږ هغه باطلې اعلان كړي.))

نوموړى په وينا پخواني انتخابات سم دي،شكايتونو كميسون خپلې گټې پدې كې روانې كړې دي هغه زياتوي: (( دويم وارانتخاباتو ته نه ځو، اونه دويم ځال انتخابات كوو))

هغه وايى: (( په اول ځل انتخاباتو كې موږ ته خلكو اخطارونه راكړي، زموږ خلك پكې شهيدان شول، گوتې، غوږونه، پزې يې پرې شوې، نوځكه دويم ځل انتخابات نه كوو.))

هغه وايى په دغه مظاهره كې ۱۰ زرو كسانو برخه اخيستې او ددغې ولسوالى ټول مهم قومونه پكې شامل دي.

يو بل تن چې په مظاهره كې برخه اخيستې دسپين بولدك ديوه ښونځي ښونكى دى، نوموړي وخت خبري اژانس سيمه ييز خبريال ته وويل: ((كله چې مو دشپى خبرونه واوريدل، دسپين بولدك لويى ولسوالى ټول خلك راوتلي، نارې وهي په لك ها و رايى مو استعمال كړي اودخپلې شفافې رايى دفاع كوي.))

معلم يحيا خان وخت ته وويل: ((زموږ خلك دشكايتونو كميسون خبرى او توطيې په سختو الفاظو غندي،خپلې اچول شوې رايې شفافې گڼي او دويم ځل ټاكنو كې برخه نه اخلي.))

نوموړى وايى موږ له كرزي حمايت كوو او هرډول سرښندنې ته اماده يو، اوترژونده به دغه دفاع وكړو.

نوموړى زياته كړه: نن تر۱۳ زرو پورې خلك را غونډ شوي او دغه ۱۰ كلومتره سرك يې ټول نيولى څو دنيا والو ته داوښيې چې اچول شوې رايې شفافې او اصلي دي.

معلم يحيا وايى موږ به ترهغې خپل جلوس ته دوام وركړو څو زموږ غوښتنې ومنل شي، كه دغه غوښتنې ونه منل شي دغه ډول مظاهرې به بيا بيا تكرار كړو.

مظاهره كونكيو وخت ته وويل چې په دغه مظاهره كې داڅكزو، باركزو، اسحاقزو، سليمانخيلو هوتكو او نوورو لويو قومونو برخه اخيستې چې له ۳ لكه زياتې رايې يې كارولي دي.

دكندهار دسپين بولدك ولسوال حاجى عبدالغنى وخت خبري اژانس سيمه ييز خبريال ته ويلي چې مظاهره كونكيو پرون ناوخت دلاريون پريكړه كړې وه او دولسوالى له مسوولينو يې اجازه غوښتې ده.

نوموړي وويل: دوى موږ ته دمظاهره دڅرنگوالي په اړه مالومات راكړي، او دمظاهرې دپيل او پاى ځاى او لورى يې معلوم كړى.

دهغه په وينا پوليسو دهغوى امنيت نيولى او تراوسه دكومې بدې پېښې راپورندى وركړل شوى.

وخت خبري اژانس خبريال په وينا مظاهره چيان دويش بازارخواته روان دي، ځايى پوليسو يې امنيت نيولى څوتاوتريخوالى رامنځ ته نشي، دوى دحامد كرزي عكسونه له ځان سره لري.

په شعارونو كې ليكلي چې، په هيڅ قيمت دويم ځل انتخاباتو ته چمتو ندي اود خپلو رايو نه به هرقيمت دفاع وكړي.

خبريال: نثارجمال په كندهاركې دوخت خبريال

اډيټ: طيب