وخت خبري آژانس
پکتيکا – برمل
د غبرګولي ٢ مه
دائتلافي ځواکونو پرپوځي کتارباندې تېره ورځ دمازيګر او ماښام ترمنځ دپکتيکا ولايت برمل سرحدي ولسوالۍ کې يوځانمرګى بريد وشو چې له امله يې هغوى ته مرګ ژوبله اووښتې ده.
ذبيح الله مجاهد چې ځان په جنوب ختيځ ولايتونو کې دوسله والو طالبانو وياند معرفي کوي رسنيو سره په مرکه کې دبريد پړه په غاړه اخيستې او وايي چې يوه ځانمرګي بريدکوونکي چاوديدونکي توکي په يوه موټر کې ځاى پرځاى کړي ؤ چې ځان يې د ائتلافي ځواکونو پر کتار ورپورې او هغوى ته يې درنه مرګ ژوبله اړولې ده.
نوموړى وايي چې دبريد په پايله کې دناټوپوځيانو څلور موټر په بشپړه له منځه تللي او ګڼ شمير سرتيري پکې وژل شوي دي، خو هغه يې دشميرې په هکله ناخبري وښوده.
له بلې خوا په جنوب ختيځ ولايتونو کې د ائتلافي ځواکونو مطبوعاتي دفترد ځانمرګى بريد پخلى کوي خو د ګڼ شمير مرګ ژوبلې خبره نه مني.
نوموړي دفتر ويلي چې پدغه بريد کې ددوى له سرتيرو څوک مړه نه دي يوازې ٤ تنه سرتيري ټپيان شوي دي .
په همدې توګه دپکتيکا والي ډاکټرمحمداکرم خپلواک هم وخت زخبريال سره په مرکه کې دځانمرګي بريد پخلي کړى خو دمرګ ژوبلې خبره نه هغه هم نه ده منلې.
نوموړى وايي چې دځانمرګي بريد له امله څوک مړه شوي نه دي.
ويل کيږي دغه بريد يو ساعت وروسته له هغه ترسره کيږي چې دپکتيکا والي اکرم خپلواک دائتلافي ځواکونو په ملتيا دبرمل ولسوالۍ د قومي مشرانو او مخورو سره د ليدو لپاره ورغلى ؤ.
دځايي چارواکو په وينا خپلواک دسيمې له مشرانو پدې موخه وکتل تر څو د ولسي خلکو حمايت د پولې دساتو په برخه کې راجلب او ولسي وګړي دولت سره د سرحدنه دترهګرو دتګ راتک دمخنيوي په برخه کې مرسته وکړي.
دځايي چارواکو په وينا له هغه وروسته چې دپاکستان نوي حکومت له سيمه ييزو طالبانو سره جوړجاړى وکړ دهغه ناوړه پايلې له اوس نه پردغه سيمې راپريوتې دي چې څرګندې بيلګې يې پدې وروستيو کې دختيځ ولايتونو په بيلابيلو سيمو کې چاودنې، وسله وال بريدونه دي.
خبريال : الهام خوستى