د دولت مخالف وسله وال طالبان وايي، چې په پكتيا او پكتيكا ولايتونو كې يې د بريد او چاودنو په څو پېښو كې ګڼو افغان او بهرنيو ځواكونو ته مرګ ژوبله اړولې ده.
د خوست ولايت ځايي چارواكي چاودنې او بريدونه مني،خو دطالبانو له خوا دمرګ ژوبلې ادعا شوې شميرې نه مني.
طالب وياند ذبيح الله مجاهد ادعا کړې، چې د پكتيكا په سر روضه او يوسف خېلو ولسواليو كې يې دپوليسو درې رېنجر ډوله موټر په بمونو الوځولي او پکې سپاره دولس پوليس يې وژلي دي.
خو د پكتيكا والي ډاكټر اكرم خپلواك بيا وخت خبري آژانس ته ويلي چې په سر روضه كې د سرحدي پوليسو په يوه موټر پسې چاودنه شوې، چې څلور پوليس پکې ټپيان شويدي. خپلواك زياتوي، چې په يوسف خېلو كې د سړك جوړونې شركت په يوه موټر پسې چاودنه شوې او درې ساتونكي يې ټپيان شوي دي.
بل خوا د پكتيا ولايت په زرمت ولسوالۍ كې د يوه قومي مشر په سراچه موټر پسې بمي چاودنې نوموړى مشر وژلى دى.
طالبان وايي، چې په همدې زرمت كې يې د بهرنيو ځواكونو يو پوځي موټر په بم الوځولى او پكې سرتيري يې وژلي دي، خو په جنوب ختيځو ولايتونو كې د ناټو مطبوعاتي دفتر وايي، چې موټر زيانمن شوى، خو څوك پكې وژل شوي نه دي.
د پكتيا په مركز ګردېز ښار كې بيا د پوليسو يوه ماموريت ته څېرمه چاودنه شوې او ځايي چارواكي وايي، چې پېنځه ولسي وګړي پكې ټپيان شوي دي.
د يوبل خبر له مخې د خوست او ګردېز پر لويه لار، د ګردې څيړۍ سيمه كې پر يوه ټانكر موټر د بريد په پايله كې ټانكر چلوونكى وژل شوى دى.