د کابل لويې جرګې په کيږدۍ کې د افغانستان د سولې ملي جرګې په نوم يوې مدنې ادارې د سلهاو تنو غړو په ګډون نن د يوې غونډې په ترڅ کې د موجوديت اعلام او خپله کړنلاره معرفي کړه .
دغه جرګه چې په نږدې وختونو کې يې د عدليې له وزارت څخه خپل جواز ليک تر لاسه کړى تر دې دمه يو لنډ مهاله مشر او ١٣ د کميټو مشران لري چې د مشرتابه وينا يې په نږدې راتلونکي کې به د جرګې د مشر او د کميټو د مشرانو د ټاکنې لپاره ټولټاکنې ترسره شي .
د دغې جرګې موقت مشر باختر امين زى نن د جرګې د پرانستونکې غونډې پر مهال ګډون والو ته وويل : (( د بن له پريکړو وروسته د ولس غوښتنې په پام کې ونه نيول شوې ، ناخوالې او ستونزې په خپل ځاې پاتې شوې ، ولس دربدره شو ، د ستونزو يوازينۍ لار مو په جرګو ولټوله چې دا جرګه هم په همدې موخه خپل کار ته دوام ورکوي . ))
د امين زي د وينا له مخې پدغه جرګه کې د هيواد د ٣٤ ولايتونو ديني عالمان ، روڼ اندي ، استادان ، قومي مشران او مخور غړيتوب لري .
امين زي دجرګې ځينو تګلارو ته داسې ګوته ونيوله : ((د اسلام د سپيڅلي دين او د اصيل افغاني کلتور په رڼا کې د هيواد ودانول ، هيواد کې د سرتاسري سولې راوستل ، د جرګو له لارې د جګړې له ښکيلو ډلو سره خبرې اترې کول ، کار خپل اهل ته سپارل ، د متوازن معارف ، روغتيايي چارو رامنځته کول زموږ له مهمو موخو څخه دي . ))
امين زي وويل چې دغه جرګه د نړۍ له هيڅ هيواد او د هيواد له سياسي او نظامي ډلې سره تړاو نه لري ، يوه خپلواکه ، ملي ناپيېلې جرګه ده او د سولې د ټينګښت لپاره کار کوي .
د سولې ملي جرګه پداسې حال کې راڅرګنديږي چې په هيواد کې ناامنۍ ډيرې او د سولې لپاره چې کومې هڅې روانې دي د خلکو د باور وړ نه دي ، دا چې دغه جرګه به تر کوم حده پدې برخه کې بريالۍ وي دا خبره وخت ته اړتيا لري .
خبريال : خواجه بصيراحمد فطري