کنړيان له دولت څخه سرټکوي چې پدغه ولايت کې د بريښنا دتوليد د امکاناتو او منابعو د شتون سره سره د دوى لپاره بريښنا کوټ نه رغاول کيږي .     

کنړ د هيواد په ختيځ کې يو له هغو ولايتونو څخه دى دبريښناېې کار پوهانو په وينا بهيدونکى سيند يې دسلګونو ميګا واټه بريښنا دتوليد توان لري چې نه يوازې کنړ بلکې دافغانستان ډيرو نورو سيمو ته بريښنا ورکولى شي .

د کنړ اوسېدونکي وايي ، دوې له هر لوړ پوړي چارواکې چې کونړ ته راغلی په سر کې پر همدې سين دبريښنا کوټ دجوړيدو غوښتنه کړې ان له ولسمشر حامد کرزي څخه يې  هم ورته غوښتنه کړې ؛ خو پدې برخه کې لا تر اوسه هيڅ هم ندي شوي .

دکونړ يو اوسېدونکی سميع الله ((تړون))نه يواځې دبريښنا کوټ دجوړيدو غوښتنه کوي بلکې داوبو او بريښنا وزير اسماعيل خان پر دې پړ ګڼي چې دبهرنيو ملکونو نه دبريښنا د راوړلو پر ځاېې ولې پر دې سين بند نه جوړوي چې ټوله ګټه په کور کې پاتې شي.

نوموړى وايي : ((داوبو او بريښنا وزير نه کونړ ته راغلی اونه ېې دا اوبه ليدلې دي ، که دې تعصب نه کوى او دکونړ اوبه وګوري بيا ددې اړتيا نشته چې له بهرنه برق را وارد کړو ، بلکې مونږ به خپله بريښنا پر نورو وپلورو .))

دى وايي چې اسماعيل خان ددې پر ځای چې افغانستان او خلکو ته ېې ګټه ورسوي نورو ته رسوي .

عبدالواحد يوبل کنړى چې دتيلو بوشکه ورسره ده وايي هره ورځ دڅلور پنځه سوو افغا نيو ډيزل اخلم .

 دې وايي که برق واى نه يوازې اقتصادي ګټه به يي کړې وای دهوا دککړتيا مخه به  هم نيول شوې وای.

 نوموړى وايي : ((زه هره ورځ لږ تر لږه لس ليټره ډيزل اخلم ،په دې ډېرې پيسې لګي ،اوکله چې جنراتور خراب شي بيا يي وړل اوجوړول هم اسانه نه دی ،موږ اوبه لرو خو هسې بهيږي . ))

دلته خلک بريښنا ته نه يوازې دکورونو د رڼولو لپاره اړتيا لري بلکې وايي له بريښنا پرته اقتصادي وده هم نا شونې ده.

 نظام الدين چې په کنړ کې د کنګل جوړولو کارخانه لري وايي : (( يوه د يخ جوړولو فابريکه لرم چې پر ډيزلي جنراتور چليږي خو لدې کبله چې زيات لګښت پرې راځي په لوړه بيه يې پلورو خو خلک يې په لوړه بيه نه اخلي ، اوس دېته اړ يم چې کارخانه مې وتړم .))

اوس چې په افغانستان کې ګرځنده ټلفونونه مخ پر زياتيدو دې ،او دچارجولو لپاره برق ته اړتيا شته ، موږ يې په بطرۍ سره چارجوو ، هغه هم کله چارج اخلي او کله هم نه اخلي، دا کار مو په د ژوند پر چارو او کارو بار باندې ناوړه اغيزه کوي .

انجنير عبدالله دکنړ د برېښنا دچارو مشر د خلکو دغه ستونزې پر ځاې بولي او زياتوي : ((ما خپل وزارت ته داهر څه څو وارې رسما ويلي ، دزاړه بريښنا کوټ چې دڅه باندې اوه سوه کيلو واټه برېښنا دتوليد توان ېې درلود ،او س ايله د سل ، دوه سوه کيلو واټه بريښنا تولېد توان لرى.))

ده وويل چې د پخواني بريښنا کوټ د رغيدو چارې د هغوې لخوا د نورم په نامه يوې روسي کمپنۍ ته سپارل شوې وې ، چې د دغې کمپنۍ لخوا يو وار جوړ او بيا د کومې ستونزې له کبله بيرته له کاره ولويده .

نوموړى زياتوي چې د دغه بريښناکوټ ځينې پرزې چې له کاره لويدلې دي هغه له مونږ سره موجود نه دي او ستونزه داده چې دلته اضافي پرزې نشته.

انجنير عبدالله زياتوي : (( دپيچ دره کې نړيوال بانک د يوه  نوي بند دجوړيدو ژمنه کړې سروې شوې امېد دى چې همدا کال ېې پر جوړېدو لاس پورې شي.))

انجنير عبدالله ته مو دخلکو ستونزو او غوښتنو په اړه وويل : (( څو وارې مې داوبو او بريښنا له وزېر نه دنوېو بريښنا کوټونو دجوړولو او د زاړه هغه چې د داودخان دواکمنئ پر مهال جوړ شوی وو دبيا جوړونې غوښتنه کړې ، خو داوبو اوبريښنا وزارت چاروکي وايي افغانستان سملا سي دومره پانګه نه لري چې لوې بريښنا کوټونه پرې جوړکړي . ))

داوبو اوبريښنا افغان وزير وايي ((لوې بريښنا کوټونه ډېرو پيسو او وخت ته اړتيا لري او افغانستان اوس ددې توان نه لرې چې ددې په څير لوي بريښنا کوټونو جوړ کړي.))

د بريښنا وزير همدا راز وايي دا هيواد سملاسي بريښنا ته اړتيا لري او زموږ په وس کې څه نشته ، اړ يو تر هغې چې خپله بريښنا تولېد کړو باېد له نورو يي واخلو ، تاسو وګورئ د يو بند تشه سروې ډېر کلونه او مليونونه ډالر غواړې اوافغانستان دولت يې وس نه لري .))  

دکنړ والي سيدفضل الله وحيدي بيا وايې (( ما دمتحده ايالاتو دبهرنيو چارو مرستيال او امريکايي سناتو رانو سره په کتنه د کنړ سيند په خوا د استنادي ديوالونو او بريښنا کوټ د جوړولو غوښتنه کړې ده . ))

د کنړ والي همدا راز وايي : ((ما دلويو مرسته کونکو نه دا دواړه غوښتنې کړې دي سر يې راته خوزولی ،خداې مهربانه دې انشا الله وبه شي،ځينې شيان داسې دي چې زموږ پرې وس نه کيږې، مجبور يو چې انتظار وکړو .))

د يادونې وړ ده چې د افغانستان د پخواني صدراعظم شهيدسردارمحمد داود په وروستېو کلونو کې دکنړ پر سيند، د اسمار په سره طاق کې ديو لوې بريښنا کوټ دجوړېدو پلان درلود خو دهغه تر وژنې وروسته پکې دډېرو په وينا نورو هومره ليوالتيا نه ده ښوولې.

 دکنړ خلک واېې که پر سين ورته بريښنا کوټونه جوړ شې نه يواځې رڼا به ولري ،ځمکې به خړوبې او لوي او وړې کار خانې به فعالې او دخلکو اقتصاد به پياوړی شې.

خبريال د کنړ په ولايت کې دنړيوال ژورناليزم مرکز د عامه اړيکې او رسنيو د ورکشاپ ګډون وال نعمت الله کرياب