وخت خبري آژانس

خوست ولايت

د غوايي مياشتې ٧ مه

 

د خوست په مركز شمل سيمه كې د اوبو د داسې يو كانال جوړولو كار پيل شو، چې د مسؤولينو په خبره به يې له بركته زرګونه جرېبه ځمكه خړوبه شي او د سيمې سلګونو كورنيو ته به يې ګټه ورسيږي .

د خوست د اوبو لګولو ادارې مشر انجنير عبدالمرخان لمر په همدې اړه، د جوړې غونډې پرمهال وويل : (( دغه كانال ٥.٥ كيلومټره اوږدوالى لري او د امريکا د متحده ايالاتو نړيوالې پرمختيايي ادارې له خوا به د شپږو مياشتو په اوږدو كې، د پېنځه سوه زرو امريكايي ډالرو په لګښت بشپړ شي.))

لمر وويل، چې خوست د اوبو دايمي سيندونه نه لري او باراني اوبه هم ډېر كله د سيلابونو په بڼه راځي، چې لږه ګټه ترې اخېستل كيږي او ډېر كله خو د ده په خبره د خوست ځمكې او باغونه هم له ځان سره په مخه كړي.

ده په دې برخه كې خوست ته د حكومت او نړيوالو پام رااړونه وغوښته او ويې ويل، چې د خپلې ادارې په هڅو يې د تېر يونيم كال په اوږدو كې له سلو زيات سربندونه او كانالونه جوړ كړي، خو اوو سوو نورو ته هم اړتيا ليدل كيږي.

د خوست د كليو پراختيا او بيارغونې ريس انجنير محمدعمر ارين وويل، چې خوست ته د غلې دانې ترڅنګ شنه سبزي هم له ګاونډي هېواده راځي او كه د ده په خبره خپلې اوبه د خپلې استفادې وړ وګرځول شي، نو ښايي خوست د ورڅېرمه ولايتونو خوراكي اړتياوې هم پوره كړي.

د خوست مرستيال والي طاهرخان صبري د غونډې له برخه والو او په ځانګړې ډول د سيمې له كرونده ګرو وغوښتل، چې كركيلې ته تر هر څه ډېر پام وكړي.

صبري د همدې خبرې په تړاؤ په دې وروستيو كې د خوراكي توكو لوړې بييې ته اشاره وكړه، چې ناوسه هېوادوال يې له گڼو ستونزو سره مخ كړي دي.

 

خبريال : الهام خوستى