وخت خبري آژانس

لغمان ولايت

٢٥ کلن احمد ‌ظاهر چې دلغمان ولايت مرکز اوسيدونکى دى وايى : (( دمهتر لام ښاروالۍ ددغه ښار اړوند فرعي سړکونه  يې دماستر پلان له مخې ندي جوړ کړي پداسې حال کې چې دجوړولو پر چارو يې دوه چنده مصارف شويدي .))

نواب خان د ښار يو بل تن اوسيدونکى توريالى بيا وايي چې د مهتر لام ښاروالۍ چې پخپله د اوسيدو تعمير جوړ نه شي کړاې نو په نور ښار کې به د ماستر پلان د تطبيق څه ګيله لرو نوموړى زياتوي چې د ښاروالۍ د ودانۍ تعمير ډير ټيټ جوړشوى ، دسيلابونو او بارانونو پر مهال له ګواښ سره مخ وي ، دنوموړي په وينا دغه تعمير دبې تجربې انجنيرانو لخوا جوړ شويدى .

٢٠ کلن ننګيالى بيا په لغمان کې دموټرو دپارکينګ له نشتوالي څخه سرټکوي او وايي چې په ټول لغمان کې د موټرونو د دريدو له پاره حتى يو پارکينګ هم نشته .

دلغمان ولايت مرکز اوسيدونکى ٣٠ کلن محمد معصوم وايي دلغمان سړکونه کم سور لري او وايي: ((په لغمان کې له عامې روغتيا څخه بيا تر دارالمعلمين پورې غزيدلى سړک پلنوالى ډير لږ دى چې د موټرونو د تګ راتګ په برخه کې خلک له ستونزو سره مخ دي . ))

بل خوا بيا دلغمان ښار وال الحاج محمد رحيم رحيم په لغمان کې دماستر پلان د پلې کيدو په اړه وويل : (( په هغه وخت کې چې دښار رغونه او بيا رغونه تر سره کيده او دښار فرعي سړکونه چي جوړيدل زه ښاروال نه وم . ))

نوموړى وايي چې له هغې ورځې چې زه ښاروال شوي يم ، هڅه کوم فرعي سړکونه دماستر پلان په اساس جوړ شي .

 هفه وويل : ((سږ کال به وکولاې شم چې ددغه ښار ماستر پلان تطبيق کړم.))

ننګيالى چې ځان د ٣٠ کلو او د مهترلام ښار اوسيدونکى راپيژني وايي د مهترلام ښارکې ، په هر ځاې کې موټر ولاړ وي او ګڼه ګوڼه يې جوړه کړې وي خلک په ښار کې دپارکينگ دنشتوالي نه شکايت لري .

ښاروال محمد رحيم رحيم د خلکو د ستونزو د تاييد ترڅنګ بيا وايي : (( دپارکينګ خبره ډيره ضروري ده ، زه کوشش کوم چې په ډيرو نږدې ورځو کې دمهترلام ښارکي مناسب ځاې پيدا او د موټرونو لپاره يو منظم پارکينګ جوړ کړم . ))

رپورټر: په لغمان کي دنړيوال ژورناليزم مرکز د" عامه اړيکي اورسنۍ" ترعنوان لاندي ورکشاپ ګډونوال شاولي نيازى

اديټران : ظاهراضطرابي اوصديقي