دپاکستان دبلوچستان ولايت دپوليسو دمالوماتو له مخې نيول شويو کسانو کې يو تن يې دطالبانو سيمه ييز کوماندان دى او دوه نورکسان له واسکټونو سره نيول شوي چې ښايى ځانمرگي بريدکونکي وي.
په ژوب كې دسيمې يو تن اوسېدونكي تمثيل خان وخت خبري اژانس سيمه ييز خبريال ته وويل چې: ((دغه نيول شوي كسان پوليسو نن ماښام په ژوب كې ونيول.))
نيول شوي كسان دامهال پوليسو دپلټنو په موخه يوه ناڅرګند ځاى ته لېږدولي دي.
تمثيل وخت ته ويلي، په نيول شويو کسانو کې يوتن طالب قومندان ملا روزي خان دى چې دژوب سيمې اوسېدونكى دى.
په سيمه كې د پاكستاني پوليسو يوتن مشر زاهد افضل هم له وخت خبري اژانس سره په خپلو خبرو كې ددغو دريو تنو نيول كېدل تاييد کړي دي.
هغه وويل چې ملا روزي خان يې دوې ورځې وړاندې په ژوب كې نيولى دى خو دوه نور طالبان يې بيا نن دژوب په ژېړتنګي كې نيولي دي.
دهغه په وينا له نيول شويو كسانو سره دوه په چاودېدونكيو توكيو پوښلي واسكټونه هم نيول شوي دي.
يوه اونى وړاندې په ژوب كې دپاکستان سرحدي پوليسو ادعاکړې وه چې دافغانستان داستخباراتو او پارلمان دوو غړيو په ګډون يې درې تنه نيولي دي،چې سمدستى دافغانستان پارلمان په ژوب كې دخپل غړي نيول كېدل ردکړل.
خبريال: جان اغا سعيد، په پاکستان کې دوخت خبري اژانس خبريال