وخت خبري آژانس

لغمان

دتلې ١٥ نيټه

 

د لغمان ولايت دولت شاه ولسوالۍ په مربوطاتو کې د کولرا د ناروغۍ د خپريدو له امله ٥ تنه مړه شوي او ٧٥ تنه نورد دغه ولايت د عامې روغتيا په روغتون کې د درملنې لپاره بستري شوي دي.

د دغه ولايت د عامې روغتيا رئيس عبدالطيف قيومي وخت خبري آژانس ته ويلي چې د دولت شاه ولسوالۍ د پراژغان کيل په دره کې دکولرا ناروغۍ خپره شوې چې تردې مهاله ددغې سيمې ٧٥ تنه ناروغان د عامې روغتيا په روغتون کې تر درملنې لاندې دي.

دى وايي چې تر دې دمه ددغه ناروغې له امله ٥ تنو خپل ژوند له لاسه ورکړى دى.

قيومي وايي چې  نوموړې سيمې ته يې د ډاکترانو يوه ډله ليږلې ترڅومالومه کړي چې خپره شوې ناروغۍ کولرا ده او که کومه بله ناروغۍ .

دده په خبره تراوسه ددغې خپرې شوې ناروغۍ څرنگوالۍ لا نه دى مالوم.

د رحم خدا په نامه يوتن چې ميرمن يې د لغمان ولايت دعامې روغتيا په روغتون کې بستري ده د وخت خبري آژانس خبريال ته وويل :((له دغه روغتون څخه د پنځو کسانو مړي تر اوسه وتلي چې په دې کې درې زنانه ،يوسپين ږيرى او يوماشوم شامل وه.))

دلغمان ولايتي شورا يوتن غړى قاري روح الله فياض وويل:((مونږ ددغې ساري ناروغۍ د مخنيوي په اړه له مربوطه چارواکو سره خبرې کړيدي ترڅو هغه سيمه چې دغه ناروغۍ پکې خپره شوې له خطر څخه وژغورل شي.))

بلخوا د ننگرهار په مرکز او په لرو پرتو سيموکې هم د ورته ناروغۍ دخپريدو خبر ترلاسه شوى دى.

دننگرهار د عامې روغتيا رئيس ډاکتراجمل پرديس وايي چې د جلال اباد ښاد په مرکز او په ساحوي کلينيکونوکې تر ٥٠ پورې کسان دنس ناستي په ناروغۍ اخته شوي خو تردرملنې وروسته روغ رمټ ستانه شوي دي.

نوموړي د دغه ناروغۍ دپيداکيد لامل د غيرصحي اوبو او داخترپه شپو ورځوکې د ډول ډول او ګډ وډو خوړو له کبله او د خلکو بي احتياطي وښودله.

ديادونې وړده چې تيره ورځ په بغلان ولايت کې هم دکولرا ناروغي دخپريدو خبر ترلاسه شوى ؤ چې دمرکزي بغلان روغتون رئيس ډاکتر خليل نرم گوي په وينا دوه تنه ماشومان دغې  ناروغى وژلي او لس تنه نور په روغتون کې تر درملنې لاندې دي.

 

خبريال _طاهر خان ساپى

 

ايډيټ   _صديقي