وخت خبري آژانس

ننگرهار- خوګياڼي

دوږي ٢٧مه

 

دننگرهار ولايت خوگياڼيو ولسوالۍ د لکړخيلو په سيمه کې تېره ورځ له غرمې وروسته يوتن افغان  انجنير او دهغه موټر چلوونکۍ د نامالومو وسله والو لخوا وتښتول شو.

دننگرهاروالي وياند احمد ضيا عبدالزى د پيښې دپخلي ترڅنگ و خت خبري آژانس سيمه ئيز خبريال ته ويلي:((د ابيارۍ يوتن افغان انجنيرله خپل موټر چلوونکي سره يو ځاى تيره ورځ له غرمې وروسته هغه مهال دوسله والو کسانو لخوا وتښتول شو چې د خوگياڼيو له ولسوالۍ څخه دخپل کار په لور روان ؤ .))

عبدالزى وايي چې د لکړخيلو په سيمه کې د نوموړي موټر لمړى دنامالومو وسله والو دسپکو وسلو تر بريد لاندې راغى چې له هغه وروسته وسله والو انجنيراو د موټر چلوونکى له ځان سره نامالوم لوري ته بيولي دى.

د عبدالزي په وينا چې تراوسه د نوموړي برخليک لا نه دى مالوم.

ده دا هم وويل چې ددغو کسانو دموندلو لپاره د شيرزادو او خوگياڼيو ولسواليو قومي مشرانو له دولت سره يوځاي پلټنې پيل کړې دي ،خو تردې دمه ددغو کسانو په موندلو کې نه دي بريالي شوي .

بلخوا دافغاني انجنير او دهغه دموټر چلوونکي د تښتونې پړه تر دې دمه کومې وسله والې ډلې پرغاړه نه ده اخيستې.

دا په داسې حال کې ده چې څه موده وړاندې دخوگياڼو ولسوالۍ د لکړخيلو په سيمه کې د ام .سي .سي  دسړک جوړونې دخصوصي شرکت يو تن انجنير له څلورتنو کاريگرانو سره يوځاى د ملانقيب لخوا تښتول شوي ؤ چې وروسته دسيمه ئيزوقومي مشرانو او امنيتي مسؤولينو په همکارۍ راخلاص شول.

 

خبريال _ساپى

ايډيټر   _صديقي