وخت خبري آژانس
زابل ولايت
د چنګاښ ٩ مه
دزابل ولایت د پوهنې رياست چارواکي انديښه ښيي چې د امنيت نشتوالى ،د ښوونې او روزنې په وړاندې دخلکو بې غوري او دګاونډي هيواد استخباراتي ادارې لاس وهنې ددې لامل شوې دي چې دسيمې دګڼ شمير ښوونځيو دروازې د زدکوونکو پرمخ وتړل شي.
داخبره دزابل د پوهنې رياست دتدريسي چارومرستيال غلام رباني او ددغه رياست علمي مشاور قاضي عبدالقدوس نن ديوې ځانګړې مرکې پرمهال دوخت خبري آژانس سيمه ييزخبريال ته کړې ده.
نوموړى وايي چې دزابل ولايت دمعارف رياست په چوکاټ کې ٢٠١ بابه ښوونځي رسميات لري چې له هغوڅخه يوازې ٢٢ بابه ښونځي په ټول زابل کې فعال او پاتې ١٧٩ ښوونځي غېر فعال او دروازې يې د زده کوونکو پرمخ تړل شوي دي.
دپوهنې وزارت لخوا زابل ولايت کې دښوونېزو چارو مشاور قاضي عبدالقدوس بيا دغيرفعال ښوونځيو پړه د ګاونډي هيواد پاکستان پراستخباراتي شبکه يا isi ور اچوي.
نوموړي زياته کړه چې د پاکستان اي اس اي نغواړي چې د پښتنو په سيمه کې په علمي ، فرهنګي ، او د بيارغاونې په برخه کې پرمختګ رامنځته شي.
د ده په خبره د پښتنو له سيمې څخه پرته په هر ځاې کې د يادوشويو کارونو څخه خلک برخمن شوي او آرامه ژوند لري.
غلام رباني وايي چې له ٢٢ بابه فعاله ښوونځيو څخه زيات شمير په مرکزکلات کې ٤ ښونځي په شهرصفا ولسوالۍ ، ٣ ښونځي په شاجوي ولسوالۍ کې ، يوه ليسه په شينکۍ ولسوالۍ کې فعال دي.
دى وايي چې دخاک افغان ولسوالۍ چې د طالبانو په لاس کې ده يوازې د هزاره ګانو په کلي يو ښوونځى فعال دى اوبس .
تدريسي چارو مرستيال وايي پدغو ٢٢ بابه ښوونځيو کې شاوخوا ١٥٤٥٤ زده کوونکي په زده کړه بوخت دي.
قاضي وايي دغيرفعال ښونځيو يوه وجه ښايي د دولت اوخلکو تر مينځ واټن وي دده په اند ترهغو به پدغو سيمو کې ښوونځي غير فعال وي څوپورې بشپړه سوله نه وي راغلې او ولس د ښوونې په ارزښتونو نه وي پوه شواى .
قاضي زياتوي چې لدغو ستونزو سره به دپولې دواړه غاړې پښتاته ترهغه پورې لاس او ګريوان وي چې تر څو پدغو سيموکې سوله نه وي راغلې او بهرنۍ لاس وهنې بندې شوې نه وي .
له بلې خوا بيا دزابل ولايت دتدريسي چارومرستيال د ټول زابل په اداري سيستم باندې نيوکه وکړه او ويې ويل چې په زابل کې اداري سيستم له نشت سره برابر دى.
خبريال : زين الله زابلي