وخت خبري آژانس
کنړ ولايت
د غوايي ١٦ مه
دننګرهارولايت په ځينو ولسواليو کې دښځينه ډاکټرانو نشتوالي ښځينه ناروغان له ډيروسختو روغتيايي ستونزو سره مخ کړي دي .
دپچيراګام ولسوالۍ يو تن اوسېدونکى چې ځان خېرګل راپيژني وايي له دې کبله چې په سيمه کې يې سيمه ييز روغتون او کلينيک شته خو ښځينه ډاکټرې نشته ،نو خپله ميرمن يې د اولاد د زيږون لپاره دننګرهار پوهنتون روغتون ته راوستي ده ، پخوا يو ه ښځينه ډاکټره وه چې هغې هم اوس کار پرېښى دى .
ده زياته کړه؛ که چيرې سيمه ييز روغتونونه فعال وي نو دخلکو ستونزې په اسانه ليرې کيږي ، اوس خلک مجبور دي چې که دکومې ميرمنې ناروغي سخته شي نوترښاره يې بايد راوړي .
هغه زياتوي چې زنانه يې ډېره وينه ضايع کړې اوپه روغتون کې ورته ده خپله وينه ورکړه.
دننګرهارولايت دعامې روغتيا رئيس ډاکټر اجمل پرديس وويل : (( په ډېريو ولسواليو کې چې ښځينه ډاکټرانې شته ٧٠ په سلوکې يې دښځينه ناروغانوستونزې حل کړې دي.))
دده په خبره ، په ځينو لرې پرتو ولسواليو کې ښځينه ډاکټرانې کليوالو سيمو کې دندې ته زړه نه ښه کوي ، کنه موږ ډېر غوښتي څوک چې غواړي کار وکړي موږ يې کلينکونو کې استخداموو .
ده زياته کړه ؛ دا چې ماموريت جبري نه دى نو همدا ستونزه ده چې په ځينو ولسواليو کې ښځينه ډاکټرانې نشته اوبل ښځينه ډاکټرانې ډېرى دښارونو اوسېدونکې دي او ليرې پرتو سيمو ته د امنيتي ستونزو له کبله زړه نه ښه کوي ، که نه موږ د هغوى لپاره د نارينه ډاکترانو په نسبت درې چنده حق الزحمه ټاکلې ده .
ډاکټرنجيبه ملکزى چې دجلال اباد په ښار کې دنسايي ولادي ډاکټره ده وايي چې خاونديې اجازه نه ورکوي ترڅو په ساحه کې خلکو ته کاروکړي.
هغه خپله دنده دخلکو خدمت بولي او وايي خو دپښتني دود او دستور دغه ستونزې راولاړې کړيدى چې زه اطمينان لرم چې په لرې پرتو سيمو کې هم ډاکټرانو ته کومه ستونزه نشته خوخاونديې نه پرېږدي ترڅوپه اطرافو کې کاروکړي.
ډاکتر شريفه چې پخوا يې دغني خېلو په ولسوالۍ کې شخصي معاينه خونه درلوده وايي چې دشپې به هم دا دخلکوکورونو ته دناروغ ليدو لپاره ورتله خو يوه ورځ چې دا پخپله ناروغه وه چا تر ښاره نه راوسته او همدا لامل ؤ چې پدغه سيمه کې دنده پريښوده .
فريده چې دسرخرود اوسېدونکې ده زياتوي چې ډاکټران دناروغانو په کيسه کې نه دي اوخپله تنخوا يې سود کړي ځکه چې درې ورځې کېږي داپه روغتون کې بستر ه ده خو څوک يې پوښتنه نکوي.
دى وايي چې يوازې دموسسې ګولۍ ورکوي او له دولته غواړي ترڅو دغريبانو غم وخوري اودرمل ورته په روغتون کې ورکړي.
دهسکې مينې يو ډريور جمال وايي له ده سره يوه ورځ په موټر کې يوه زنانه اوخاوند سپاره وه چې پرلاره يې ماشوم وزېږاوه، تر هغو چې روغتون رسېدل ماشومه يې په لاره مړه شوې وه .
هغه وايي کليوالو سيمو ته د ښځينه ډاکټرانو نه تګ په کليوالو سيمو کې دوسله والو شتون دى .
خبريال : محمد طاهر ساپى