د خوست ولايت د صبريو ولسوال ګل قاسم جهاديار نن سهار له يوې بمي چاودنې هغه مهال روغ رمټ ووت چې د خپل کور خوست ښار نه د صبريو ولسوالۍ ته دندې ته د تلو په حال کې ؤ .

نوموړي دغه خبره نن د وخت خبري آژانس له سيمه ييز خبريال سره کړې ده او زياتوي چې دى دخوست له ښار څخه خپلې دندې ته د تلو په حال کې ؤ چې د يعقوبيو په ښارګوټي کې د ده پرسورلۍ وړونکي موټر پسې بمي چاودنه ترسره شوه .

جهاديار وايي چې د ده موټر ته هيڅ زيان نه دى اووښتى خو پده پسې را روان ټکسي موټر ټولې ښيښې ماتې شوې دي .

نوموړى زياتوي چې له نيکه مرغه په ټکسي موټر کې سپرو کسانو ته زيان ځکه نه دى اووښتى چې ماين مخامخ پر هغوى هم نه دى چاوديدلى بلکې په هغو پسې متصل چاودنه شوې ده .

صبرۍ د خوست ولايت له هغو ناکرارو ولسواليو څخه ده چې د افغان او ناټو ځواکونو باندې د بريد ترڅنګ کله ناکله پر قومي مشرانو او دولتي چارواکو هم بمي بريدونه ترسره شوي دي چې په لړ کې يې څه موده وړاندې د سيمې د يو قومي مشر پر موټرباندې چاودنه کې د کورنۍ څو غړي يې وژل شوي ؤ .