وخت خبرى اژانس
خوست ولايت
دليندۍ ۱۷مه
د خوست ولايت په ملي لوبغالي کې د زون په کچه له څو ورځو راهيسې د فوټبال پيل شوې سيالۍ پاى ته ورسيدې او وروستۍ لوبه چې د خوست او لوګر ولايتونو ترمنځ وه، دوه د صفر پر وړاندې د خوست په ګټه پاى ته ورسيده.
دغه سيالۍ، چې دالمپيک ملي کمېټې له خوا جوړې شوې وې د پکتيا، لوګر، غزني اوخوست ولايتونو د فوټبال وتليو لوبډلو پكې برخه اخېستې وه.
سيالۍ جوړوونكي وايي، چې موخه يې د هېواد په كچه د پياوړي زون مالومول دي او کېداى شي د همدې سياليو ځيني وتلي لوبغاړي د ملي ټيم له پاره هم غوره كړل شي .
د فوټبال دغه سيالۍ له تېرې جمعې را په دېخوا د خوست په ملي لوبغالي کې كيدې او هره ورځ يې نندارې ته د خوست له بېلابېلو سيمو زرګونه تماشه چيان راټوليدل.
د خوست المپيک امرغزيزملنګ وخت خبرى اژانس سيمه ييز خبريال ته وويل، چې ورته سيالۍ د هېواد په ټولو زونونو کې دالمپيک ملي کمېټې له خواجوړې شوې او له دې وړاندې هم درې ځله خوست د ورته سياليو اتل پاتې شوى دى.
له پكتيا څخه د راغلې فوټبال لوبډلې مشرپيرمحمد ويل چې په دغو سياليوکې يې په ډېر شوق او مينه لوبې وکړې، نوموړي له دولت څخه غوښتنه کوله چې دورزش په برخه کې دې له دوى سره مرسته وکړي.
د دې سياليو وروستۍ، يا فاينل لوبه د خوست او لوګر لوبډلو ترمنځ وه، چې خوست وکولى شول د لوګر په لوبډله دوه ګولونه ووهي او د دې زون اتلولي په خپل نوم کړي.
خوست له دې يوه ورځ وړاندې پكتيا لوبډلې ته هم پېنځه د صفر پر وړاندې يوه حيرانوونكې ماتې وركړې وه.
د وروستۍ لوبې له سرته رسيدو وروسته، هغه ډالۍ چې د المپيک ادارې او يو شمېر خصوصي شركتونو له خوا برابرې شوې وې، پر غوره لوبغاړو ووېشلې شوې .
د يادولو ده، چې په ټول خوست كې نېږدې لس زره لوبغاړي، په څوارلسو بېلابېلو لوبو بوخت دي، خو تر دې وخته د لوبو له پاره وړ لوبغالى نه لري.
د خوست المپيك اداره وايي، چې اوس يې له خپلې بوديجې له يو ميليون زيات ډالر منظور كړي، تر څو په خوست كې شته لوبغالى، چې يوازې چارديوالي لري او دوه ويشت جريبه ځمكه يې نيولي، په عصري ډول پرې جوړ كړي.
د مسؤولينو په وينا به دغه لوبغالى له جوړيدو وروسته د اتلسو زرو كسانو د ځايولو وړتيا ولري او د خوست لوبغاړو ته به پكې د بېلابېلو لوبو اسانتياوې برابرې شي.
خبريال: الهام خوستى، خوست كې وخت خبريال
اډيټ: طيب